لجنة الحكام تنتقد بيان الأهلي ضد تصريحات حكم القمة
علق عصام عبد الفتاح رئيس لجنة الحكام المصرية على تصريحات محمد عادل حكم مباراة القمة، بعد الأزمة التي أثيرت خلال الساعات الماضية بسبب تصريحاته الإذاعية، وقيام النادي الأهلي بإصدار بيان رسمي للرد على هذه التصريحات.
وقال رئيس لجنة الحكام في تصريحات متلفزة: “محمد عادل لما حس بتوتر اللعيبة بلغ الحكام أنهم لازم يعملوا إدارة للمباراة بشكل كويس، فين الأزمة في كده هل الحكم في طرد محسبوش؟ بلن محسبوش؟ ليه الحملة دي كلها عليه ولفظ الاحتواء مقصود بيه السيطرة على المباراة”.
وأضاف: “مينفعشي لما يطلع حد يتكلم بنية طيبة وبشكل عفوي يتحور بشكل ثاني.. إحنا سمحنا للحكم يتكلم معاك يا كابتن شوبير علشان ياخد حقه زي ما باقي زملاءه اللي حكموا مباراة القمة الموسم اللي فاتت وحضرتك استضفتهم كمان، محمد عادل بيقول المباراة جت في وقت معين حصل توتر للعيبة”.
وتابع: “الحكم محمد عادل قدم مباراة كبيرة في القمة غصب عن أي حد.. ومفيش مخلوق في مصر يقدر يتدخل في عمل لجنة الحكام.. وبقول للمحايدين يسمعوا تصريحات الحكم بشكل كامل وبعد كده يحكموا.. والحكم قال معاك يا كابتن شوبير نصًا لو في خطأ أو طرد أو ركلة جزاء غير محتسبة الفار بيراجعني”.
واختتم: “بيان الأهلي عن تصريحات الحكم محمد عادل في غير محلة وهناك محاولات تصيد في الماء العكر.. أرحمونا شوية واعرفوا قيمة التحكيم”.
