ميدو يفتح النار على كلوب بسبب محمد صلاح

شن أحمد حسام ميدو نجم الزمالك ومنتخب مصر السابق هجومًا ناريًا على الألماني يورجن كلوب المدير الفني لنادي ليفربول الإنجليزي بسبب تصريحاته الأخيرة بإراحة ساديو ماني أسوة بمحمد صلاح وذلك قبل مباراة مصر والسنغال في تصفيات كأس العالم قطر 2022.

وقال ميدو خلال تقديم برنامجه “الريمونتادا”: “عمري ما شوفت مدرب بيقول كدة في الدنيا، من المفترض أن يورجن كلوب مدرب ليفربول مصلحته فقط تكمن في مصلحة ليفربول ولكن من المفترض ألا ينظر لمصلحة ماني أو صلاح”.

وأوضح: “ماتش مصر والسنغال ملوش دعوة بليفربول، ورسالتي لكلوب أنت كدة اتأثرت بالهجوم اللي كان عليك من أليو سيسيه مدرب السنغال قبل كأس الأمم الأفريقية بالكاميرون”.

وواصل: “غياب ماني عن مباراة نوتنجهام رغم جاهزيته وتصريحاته بعد المباراة عن وجود عدل بين صلاح وماني، دي مش قصتك مصلحة فريقك ليفربول بس هي اللي تهمك، وليس مصلحة أي لاعب، وانت خوفت من أليو سيسيه”.

واستمر: “كلوب دفع بمحمد صلاح في مباراة أرسنال، رغم إن صلاح مكانش جاهز بنسبة 100% ليه مخوفتش على مصلحة اللاعب”.

وأرظف: “أنت المفروض يا كلوب راجل ألماني عملي يهمك مصلحة ليفربول بس، انت مدرب كورة ملكش دعوة بماتش مصر والسنغال، انت مش ربنا عشان تحقق العدل، انت خفت من رد فعل أليو سيسيه”.

وأكمل: “كلوب خاف من أليو سيسيه مدرب السنغال، والمدرب بيتكلم في السياسة وهل مفيش أندية في إنجلترا على علاقة وطيدة بإسرائيل، ليه عمرك ما عاتبت الأندية دي زي ما عاتبت الأندية اللي بتتعاون مع روسيا، وانت وجهت كلام في السياسة عشان تخدم الإعلام الغربي ده مش مظبوط”.

واستطرد: “هل أنت عارف فلوس ملاك ليفربول جاية منين، زي ما انت هاجمت تشيلسي بسبب أبراموفيتش وتحالفهم مع روسيا”.

وتابع: “ملاك ليفربول على علاقة وطيدة ببوش رئيس أمريكا الأسبق، اشمعنا متكلمتش على فلوس ناديك”.

وأنهى: “مسألة السياسة مش قصتك يا كلوب، انت مدرب كورة بس، والمدرب بيدخل نفسه في قصص مختلفة”.